Mbunge inene na mbunge ya Senate narua ikaringa kura ya gutaara antu baria bagatwika abunge ba Kenya mbungene ya nthiguru cia East Africa-EALA.

Kenya ibwirite gutuma antu kenda mbungene iu naria batano bakauma ngwatanirone ya Kenya Kwanza nabo bana baume ngwatanirone ya Azimio.  Kenya Kwanza nirikitie gwitikaniria antu bayo batano bakethirwa bari David Sankok, Hassan Omar Sarai, Zipporah Kering, Falhada Dekow Iman na Fred Muteti. 

Ngwatanirone ya Azimio o kiama kirinenkanira maritwa ja antu bakio abunge batara kuuma kiribo naria maritwa jaria janenkaniri ni kiama kia ODM ni amwe na ria mwari wa mutongeria wa kiama Winnie Odinga.  Maritwa jaria janenkaniritue ni kiama kia Wiper ni amwe na ria mutana wa mutongeria wa kiama Kennedy Musyoka ondii najo maritwa jaria janenkaniritue ni Jubilee ni amwe na ria Kaniini Keega na Jeremiah Kioni. 

Najo mantu ja kethirwa thirikari ikanenkanira mbeca cia NG-CDF kana itinenkanira jari njarene cia munene wa watho Justin Muturi.  Jau ni nyuma ya thirikari kuuga kayeterete muturi aejana kirira kiegie watho nyuma ya korti kugita CDF nigukirithana na uria katiba ikuuga na ibwirite kweberua.