Korti ya gucokia magamba Nyeri narua nirigiri kugita kethirwa MCA ba County ya Meru nibakirithanite na watho gutumira mantu jari kortini jari itumi biria batumirite gukurukia rwaria rwa kwenda kweberia Gavana Kawira Mwangaza gitine.
Jau ni nyuma ya wakili ba Kawira gucokia igamba riu kiri korti ya Nyeri, korti nene ya Meru naria barikitie kuri kwa mbere ikuuga itikwona igamba riu ribwirite kugitwa na mpwi na yauga ikarigita mweri twitite. Wakili ba Kawira bariuga igamba riu ribwirite kugitwa oriu mbere ya mutaatara jwa kweberia Kawira gitine juria jwitite na mbere jukinya muthia.
O kagitene kau spika wa mbunge ya County ya Meru Ayub Bundi narikitie kumenyithia mbunge ya Senate MCA ba County ya Meru nibakurukitie rwaria rwa kwenda kweberia Kawira obicine.
Kuringana na watho spika wa Senate Amerson Kingi nandi arina ntuku mugwanja ethirwe akuthithia gikaro kia mbunge iu ya Senate kuthithia kamiti ya gutegeera kethirwa itumi biria MCA baejene bia kwenda kweberia Kawira gitine birina kiriki.
Kamiti iu yathithua ikethirwa irina ntuku ikumi cia kurikia ngugi yayo na irete report mbungene iu ya Senate naria Senator bakaewa kanya ga kumiringira kura ya kumikurukia kana kuregana nayo na no kinya bamithithirie ugaruruku mbere ya kumikurukia.
Kungi naku aritwa baria mwaka juju bakuthithia magerio ja kuthiria Primary mathomone ja CBC na kinya ba mathomo ja 8-4-4 narua bakonerua uria bakathithia magerio mutaratarene juria jwijikene mono na ritwa Rehearsal.
Magerio ja kuthiria Primary mathomone ja CBC nijo KPSEA na ja kuthiria Primary mathomone ja 8-4-4 nijo KCPE jarithithua kuuma Jumatatu ya kiumia twitite mwanka Jumatano ya kiumia okiu.
Gavana wa County ya Tharaka Nithi Muthomi Njuki noritie aritwa baria bakuthithia magerio ja KPSEA, KCPE na kinya KCSE baewe kanya gakeega ga kuthithia magerio jao kiumia twitite.
Atongeria ba kuuma Meru baria bakugwata mbaru mantu ja Gavana Kawira Mwangaza kweberua obicine niboritie atongeria kuuma oome ya Meru baciebanirie na gutonyeera mutaratara juu.
Mubunge wa mwekuru Tharaka Nithi Susan Mwindu nameneretie micetho iria mubunge wa Tharaka Gitonga Murugaara na wa Tigania East Mpuru Aburi bakuthithia icigone biu bio biiri bakiugaga ni ya kureta thiiri naria akuuga ti thiiri bakureta nayo ni siasa bakuringa.
Anene ba thirikari nene Igembe North nibakanitie mantu ja aana ba Cukuru kuthiurukaga Town ya Laare jaria jatabarikagia kagitene ta gaka aritwa bari rutha. Mwandiki nteto wetu Dorcas wa Lydia Ntoitha na nteto tariria.
Ataramu ba mantu ja mirire Tharaka Nithi mweri juju nibakuthomithia antu County iu bia kuria biria babwirite kurera nabio aana bao mono mono bata ya Vitamin A kiri mwana muniini. Mwandiki nteto wetu Pamela Mukami wa Muthee nagutwaa ikwinya.
Sacco ya Solution Sacco nigwatanirite na obici ya DCC Buuri West na Cukuru ya Primary ya Timau kwaanda miti Cukuru iu iri njira imwe ya kumenyeera iera. Mwandiki nteto wetu Edwin Gatobu nagututariria nkuruki.
Recent Comments