Wakili Dastan Omari ariuga kwombika ngabana wa county ya Meru Kawira Mwangaza ageeta na mbere gukara obicine ya ngabana wa Meru mwanka mwaka jwa 2027. Akiaria wakili Omari uria waari wakili wa Kawira au kanyuma ariuga jonthe jaria jethiri jagikujiirwa Meru ni ciaca. Ariuga Senate gwitikiria kwaania Kawira ria jathatu, ni ciaca ntheri na katiba igategeera bwega kethira jaria Kawira athitangi najo nijabateeri kumwaania.
Oho Omari ariuga korti niyo ikathingatiira katiba ya Kenya na korti nirikie kujukia makinya kuringana na watho kenda kwithirwa na kaanya gagutegeera jaria Kawira athingati najo.
Omari ariuga baria babanganitie kwaana kwa ngabana Kawira bataibangite bwega nontu gukeeja kwithirwa ibaibangite babateeri kunyuithia munini wa ngabana Mutuma M’ithingia muuma thaa kenda cia utuku, na mpwii uria kumbikika nontu nibeene uria ndwaaria cia impeachment ciithiri ikari Kenya.
Omari ariuga mutaratara juju noju jwatumikire kwiinga waari ngabana wa Nairobi Mike Sonko na utuku oo buu waari munini wawe Kananu Mwenda aranyuithua muumma.
Ongerete kuuga mawakili ba Kawira nibachanukire na ba ruteere rwa mbunge ya County ya Meru baramama ngugine. Augite aja bagatuura gukuchania mwanka mukondo jwa utongeria jwa ngabana Kawira Mwangaza juriike. Ariuga mawakili ba Kawira nibo bakamwika gitine mwanka mwaka jwa 2027.
Recent Comments